Ymgynghori ar gynnig adeilad Ysgol Plas Brondyffryn

Mae ymgynghoriad ar gynigion i greu adeilad ysgol newydd ar gyfer Ysgol Plas Brondyffryn.

Mae Ysgol Plas Brondyffryn yn ysgol 3-19 sy’n darparu darpariaeth arbenigol ar gyfer disgyblion ag awtistiaeth. Y cynnig yw dod â 3 o’r 4 safle presennol yn Ninbych at ei gilydd mewn adeilad pwrpasol a chynyddu capasiti’r ysgol o 116 i 220 wrth i’r galw am y lleoedd arbenigol hyn gynyddu.

Y safle arfaethedig ar gyfer yr adeilad newydd yw’r cae drws nesaf i Ganolfan Hamdden Dinbych a ddefnyddir ar hyn o bryd gan Ysgol Uwchradd Dinbych. Mae’n eiddo i’r Cyngor. Mae’r cynnig yn dal i fod yn amodol ar gyflwyno cais cynllunio a bod cyllid ar gael.

Gall y rhai sydd â diddordeb mewn gweld y cynlluniau fynychu sesiwn galw heibio ddydd Mercher 28ain Medi 4-7pm yn Ysgol Plas Brondyffryn, safle Stryd y Parc, Dinbych. Bydd y cynlluniau yn cael eu harddangos a bydd aelodau o dîm y prosiect ar gael i drafod y prosiect.

Dywedodd y Cynghorydd Gill German, Aelod Arweiniol y Cabinet dros Addysg, Gwasanaethau Plant a Theuluoedd: “Mae’r datblygiad arfaethedig hwn yn rhan o raglen Cymunedau Cynaliadwy ar gyfer Dysgu gan Lywodraeth Cymru ac mae £23.8 miliwn wedi’i ddyrannu ar gyfer y datblygiad hwn.

“Mae’r Cyngor hefyd wedi gwneud ymrwymiad i ddarparu 25% o gost y prosiect, yn amodol ar achosion busnes cymeradwy ac mae’n amlygu’r ymrwymiad yn ein Cynllun Corfforaethol i wella cyfleusterau addysg ar gyfer ein plant a’n pobl ifanc.

“Mae yna nifer o gamau i fynd trwyddynt, gan gynnwys yr ymgynghoriad cyn-cynllunio yma, cyflwyno’r cais cynllunio, cais i gyhoeddi hysbysiad statudol i gynyddu capasiti’r ysgol a chais ffurfiol am gyllid.

“Byddwn yn ystyried yr holl ymatebion a gyflwynir fel rhan o’r ymgynghoriad cyn-cynllunio hwn”.

Mae’r cynlluniau a’r ffurflen ar-lein ar gyfer sylwadau ar gael yma.

• 

• 

• 

• 

Cynigion ar gyfer Ysgol Plas Brondyffryn

Mae cynigion yn cael eu paratoi ar gyfer cyfleusterau newydd yn Ysgol Plas Brondyffryn yn Ninbych, sy’n darparu ar gyfer disgyblion sydd â Chyflyrau Sbectrwm Awtistiaeth o 3-19 oed.

Gallai’r cynigion fod yn rhan o’r don nesaf o brosiectau buddsoddi mewn ysgolion trwy Raglen Cymunedau Cynaliadwy ar gyfer Dysgu Llywodraeth Cymru, yn flaenorol y Rhaglen Ysgolion a Cholegau’r 21ain ganrif.

Bydd y prosiect yn amodol ar gymeradwyaeth y Cyngor a Llywodraeth Cymru o’r achos busnes, ynghyd â chaniatâd cynllunio.

Fel rhan o’r cynnig, bu i Gyngor Sir Ddinbych benodi Wates Construction i wneud cam 1 dyluniad prosiect yr adeilad newydd.

Y cynnig yw dod a tri o bedwar safle’r ysgol ynghyd mewn un adeilad newydd sbon a adeiladir ar y maes chwarae drws nesaf i Ganolfan Hamdden Dinbych.

Bydd y cynnig yn golygu y bydd yr holl ddisgyblion a staff yn dod ynghyd mewn cyfleuster pwrpasol newydd sbon a fydd yn sicrhau bod gan yr ysgol amgylchedd dysgu hyblyg i alluogi’r ysgol i gyflwyno’r gofynion cwricwlaidd sy’n newid i fodloni anghenion y disgyblion a’u helpu i gyrraedd eu potensial llawn.

Bydd disgyblion Ysgol Plas Brondyffryn yn parhau i gael darpariaeth breswyl yng Ngherddi Glasfryn.

Dywedodd David Price, pennaeth Ysgol Plas Brondyffryn: “Mae hwn yn gyfnod cyffrous i’r ysgol wrth i ni ddod a’r holl ddysgwyr a’r staff ynghyd ar un safle i gyfleuster pwrpasol a fydd yn cynnig rhywbeth arbennig iawn i’n disgyblion.

“Mae cyfarfodydd cychwynnol gyda Wates a’r Awdurdod Lleol wedi bod yn gadarnhaol iawn ac mae’r staff a minnau yn edrych ymlaen at weld sut bydd y cynlluniau yn datblygu a’r gwaith yn cychwyn ar y safle.”

Meddai’r Cynghorydd Huw Hilditch-Roberts, Aelod Arweiniol Addysg, Gwasanaethau Plant ac Ymgysylltu â’r Cyhoedd: “Ar ôl cwblhau Band B yn llwyddiannus yn Sir Ddinbych a welodd dros £90 miliwn o fuddsoddiad mewn adeiladau ysgolion ac a oedd o fudd i fwy na 4,300 o ddisgyblion yn Sir Ddinbych, rwy’n falch iawn o weld gwaith ar ein cam nesaf o adeiladu ysgol newydd yn dechrau.

“Mae’r prosiect hwn yn flaenoriaeth uchel i’r Cyngor ac yn enghraifft arall o ymrwymiad Sir Ddinbych i fuddsoddi mewn cyfleusterau addysg ac mae’n rhan o’n gwaith i sicrhau pobl ifanc yn cael y cychwyn gorau posib mewn bywyd.”